Cheese of the Week 03: Samporado ni Lola

Naa’y mga buntag nga wala ka kasabot sa imong gibati. Kanang buntag gani nga sidlak na man unta kayo ang adlaw apan wala ka ganahi ug bangon kay gusto ka magtinapulan maski usa lang ka-adlaw. Maski kanang adlawa ra gud. Mao g’yud nang adlawa nga sa imong pagmata gisapot ka (wala man unta ka gidugo).

Makahuna-huna dayon ka sa mga adlaw’ng nilabay. Kadtong panahon nga kumpanya lang sa jolen, lastiko ug different-stitches-project ni ma’am ang imong problema. Kadtong ang pamasahe sa sikad kay piso ra, unya kay magbaktas ra man ka pauli gikan eskwelahan, makapalit na dayon ka ug naka-cellophane nga guppy maski wala mo’y aquarium. Kadtong mahadlok pa unta ka ug eclipse pero motan-aw ra diay gihapon ka sa planggana nga naa’y tubig kay lisod na mabiyaan sa tsismis sa lunes.

Sauna, kung magbakasyon sa summer dili kinahanglan ug kwarta. Ibilin lang ka sa balay sa imong lola uban imong mga ig-agaw, payts na. Mura na sad ka’g naka-adto s’bulan s’kalipay. Maayo man sa balay sa imong lola kay unlimited ang TV, libre sa silingan ang cable unya daghan pa gyu’ng alindanaw sa kasagbutan kilid sa kanal. Kung naa man tingali’y pait sauna, wala kayo nimo batia. Kay maski nagbaha na ang tibuok kalibutan, maka-ngisi gihapon ka kay makapalug taw na sad ka’g gagmay’ng bangkang’ papel.

Lami ra kayo sauna kay makapainit pa ka kada-palis ug ice candy og panso. Apan mas hayahay kung ang imong lola mag-luto ug samporado. Sa tanang samporado nga imong natilawan, pinakalami g’yud ang sa imong lola. Ang tableya kaniadto murag piso ra kada-lingin, puro, ug wala’y sagol nga harina. Mao nang humot kaayo ang samporado sa imong lola. Wala g’yu’y masayang nga bahaw.

Karon nag-mahal na ang tanan. Ang imong kalipay, mahal-mahal na sad. Nibalhin na’g subdivision imong lola. Wala na lagi’y baha apan wala man say tubig s’buntag. Naa gihapo’y mga alindanaw pero tagsa na lang. Murag ma-ulaw na pod ka manakop kay propesyunal na kuno ka (wa ka kasabot unsay’ pasabot nila, pero nituo pud ka).

Naka-sulod na sa plastic cup ang samporado nga sauna ginaluto pa g’yud sa imong lola. Wa’y lami ang Maggi Champorado pero mukaon gihapon ka. Paminaw nimo gi-atik ra ka sa advertise pero di na ka mu-kitiw kay lisod na mangita ug tableya.

Hay, maka-mingaw ang sauna. Gi-mingaw na sad ka sa imong mga lola. Kani lagi’ng manarbaho ta, usahay malimot ta’g bisita panagsa. Naa’y mga buntag nga maka-huna-huna ka, mao ba ‘ning ginatawag nila ug karera? Murag lumba sa dagan sa mga gi-breed nga kabayo. Lumba hangtod sa makapoy pero ‘nig tan-aw nimo sa imong bulsa wala man gihapon diay ka’y kwarta. Sige lang, daghan man sad ka’g natun-an unya salamat sad sa experience. Pero ngano man lagi ang uban? Nakatuon na, naka-kwarta pa?

Sa mga buntag nga ang kamingaw nimo murag dili na gyud ma-agwanta, pagluto na lang ug samporado unya isipa nga gikan na sa imong lola. Ginhawa ug lalom unya ginhawa usab. Kay bawal magyawyaw kung pagkatad-taod ma-realize nimo, gidugo na diay ka.